20. Hochziitstag

Mir sind da Johr 20 Johr verhürotet und händ eus 3 wunderschöni Täg imene Wellnesshotel gleischtet. Eso wie me do gseht, sind mir empfange worde, eifach allerliebscht.

Au suscht, het's eus a nüt gfehlt. Eifach emol wieder nume Ma und Frau si ohni Chind, Chatz und Hund... Mir heis eifach gnosse und wüsse hüt scho, dass es keini 20 Johr me bruucht, bis mir wieder so öppis mache!!!

E super Lag het da Hotel und sogar e Schwiizerfahne wo weiht!

E Apéro muess si

Vor em Aesse hämer eus meischtens e Apéro genemigt. Cocktailcharte het mi Maa bsunders guet gschtudiert. Es het no viel, wo mer no nid känne...

Alle guten Dinge sind 3!

Euse Sohn de Ramon het da Johr 3. mol Unfall gmacht. Damol het er e tiefe Schnitt im Chnüe und müsse mit 8 Stich neie. Er isch aber sehr tapfer gsi und cha scho wieder echli lache. Also ich für min Teil hät gnueg für da Johr, gäll Ramon :) !!!

Firmig am 12.09.2010

Euse "grossi" Sohn de Kevin het Firmig gfiiret. Do gseht mer ihn grad mit sim stolze Firmgötti.

Es isch e super Tag gsi und mir händs alli gnosse. 

Zobe si die verruckte Manne sogar no is Kino.

Au am Kevin sini Fründin d'Lea isch bi sim Fäscht debei gsi und sogar de Joschi isch id Chille cho!

Do gseht me grad am Kevin sis feini Dessert und sin Firmgötti mit em Gschänk.

Milchzäh

Das sind die letschte Milchzäh vo eusem Hundemeiteli. Die 3 grössere händ mir sogar müsse lo zieh. Jetzt isch die spitzegi Ziit verbi...

de letschti Geburtstag mit em 3 vornedra

Mi "chli" Brüder de Christian isch für e Churztripp i'd Schwiiz cho und het eus alli zu sim 39. Geburtstag iglade. Sogar min andere Brüder de Hanspi het chönne cho. 

Mir händ e gmütliche Obe zäme verbrocht und s'Aesse im Pöschtli z'Böze wie immer de Hammer!

5 - Kids

Das isch Band 5 - Kids

E Jugendband wo sich us Spass am Singe und Musiziere zäme do het.

Do händ si grad ihre erschti öffentlichi Uftritt am Dorffäscht in Eike vor sich.

Es isch super gange, händer toll gmacht:)))))

Die einzelne Mitglieder stell ich euch grad vor:

das sind die bede Sängerinne Tatjana und Tamara

das isch de Gitarrischt de Ramon

das isch d'Keyborderin Chiara

und das isch de Drummer Noah

11. Geburtstag

Happy Birthday Ramon:)

Am 25. Auguscht isch euse Sohn de Ramon 11 Johr alt worde.

Mir händ e schöne Tag zäme verbrocht, aber i glaub s'gröschte Gschänk isch nach wie vor eusi Akyra für ihn.

Blib gsund und munter und eifach wie du bisch!!!

Bsuech us Dütschland

Hüt han ich ganz, ganz liebe Bsuech vo minere Züchterfamilie us Dütschland becho.
Mis Mami Clea und Tante Lotte mit de Cornelia, de Irina und em Rainer sind extra sowit gfahre, um mich z'bsueche. Ich ha mich sooooooooooo gfreut!
Ich ha's richtig gnosse mit ihne de Tag z'verbringe. Und übrigens, d'Lotte isch hüt 2 Johr alt worde!!!
Danke, danke vielmol für euer Cho :)))

Neuer Kleiderkasten

Sogar e neue Chleiderchaschte, oder besser gseit 2 händ mir eus zueto.
Es isch richtig schön worde, und man siehe und staune, mi Maa het de gross Chaschte und ich de chli!!!

A dere Stell möcht ich vor allem eusne Söhn ganz fescht danke säge für ihri super Hilf!!!

Ohni euch wär's nid gange, danke Kevin und Ramon:))

Eusi neui Sitzgruppe

Mir händ eus e neui gmütlichi Sitzgruppe gleischtet.
Eifach schön....

Zeltferie i der Riismatt

I dene Summerferie het me meh als 1x chönne im Zält schlofe.
De Papi und de Ramon händ da sehr gnosse. Am Morge isch denn d'Akyra go Tagwach mache.....

Fussball-WM ade...

Fussball-WM ade... I bi mit mine Föteli echli hindedri.... Da isch di letschti Wurscht gsi i eusem WM-Stübli! E schöni Ziit goot's end. Gratulation ESPANIA! Aber i bi nid verruckt, dass jetzt wieder Normalzustand isch i eusere Stuube. Richtig schön...

Eusi Stube

Eso gseht eusi Stube normalerwiis us. Da heisst, i ha grad de Ramon als Patient dehei gha, da ghört nid zum Alltag.

Und wenn denn e Fussball-WM astoht, denn gseht eusi Stube eso us...

Grüezi Südafrika, mir wünsche allne e ganz e schöni Fussball-WM!!

für die nöchschte 14 Täg sind mir im Fussballfieber

e andere Teil vo eusere Stube

Euses WM-Stübli

So gseht euses WM-Stübli 2010 us.

Ich ha da 1.mol gmacht, wo d'WM in Dütschland gsi isch und da het mine Manne eso guet gfalle, dass ich da jetzt bi jedere EM oder WM "darf" mache!

Eifach Stube usruume und neu dekoriere. Damol han i echli länger bruucht, denn eusi Akyra het au no chli wölle hälfe...

Wälpespielgruppe

Hüt sind mir mit eusere Akyra in der Wälpespielgruppe gsi.

Nach churzem Abwarte isch si voll debi gsi.

Hei, isch das de Plausch :)

Gschänkli vo mim Gotti

Mis Gotti Anki isch hüt mit em Nadja uf Bsuech cho. Und lueget emol ,wa für e superlässegi Decki ich vo ihre übercho ha!! Do cha ich soooo guet spiele und kuschele.

Danke Gotti viel vielmol !!!

Und übrigens, ich glaub si het mi scho chli gärn!

Min 1. Tag dehei

Das isch min 1. Tag i mim neue Dehei. Es gfallt mer gar nid eso schlächt...

Mini Lüt gänd mir z'ässe, si spiele und schmuse mit mir und echli go laufe gönd si au.

Nur de Luigi, de Kater vo minere neue Familie muess sich no echli a mi gwöhne. Ich wött so gärn mit ihm spiele, aber er nid.... I glaub, i bin ihm echli zwild! I muess hald no echli Geduld ha.

I freu mi scho :)

Willkomme !

Willkomme Akyra !

Hüt isch's Elomeiteli Akyra bi eus izoge. Mir hände e super Heifahrt gha und si het sich scho echli igläbt.

Jetzt lömer eus überrasche, was s'Läbe mit emene Wälpe eso mit sich bringt.

Mir freue is sehr :)

Ueberbouig

Mi Schatz'l het für de Luigi e sicheri Verpflägigsstell bout. Und siehe da, es klappt!

Do söll no eine säge Chatze sige dumm!!

Und ab morn zobe bechunnt d'Akyra ihres Fresse undedra.

Mir freue eus sehr....

Gschänkli

I ha es Gschänkli gmacht für eusi liebe Hundezüchter usem Dütsche, wo mir am Donschtig d'Akyra chönne go hole. Ha e Foticollage gmacht und de Rahme derzu echli verziehrt.

I hoff si händ e Freud!

Baschtelobe

I bi sit langem wieder emol amene Baschtelobe gsi!!!

Mir hei e Etagere mit Pilzdeko baschtlet. Mir gfallt's richtig guet.

Danke Muetter :)

Hundemarke

So, jetzt isch es au uf em Papier offiziel. I ha d'Akyra agmäldet und mir händ ihre au scho es schön's Bändeli kauft. Ueberhaupt nüt rosarot, sondern richtig schön orange!!!

Hundesitter

Hüt isch euse Laufstall cho. Hät nie dänkt, dass mir für euse Hund emol eine chönnte brueche.

Aber, säg niemols nie!

Happy Birthday

Happy Birthday Luigi :)

Geschter isch euse Kater 2 Johr alt worde.

Vor luter Vorbereitige uf de d'Akyra hätte mir's fascht verschwitzt, aber nume fascht...

Es het fein's Parfait geh, mmh.

Min Papi

Da isch min Papi, de Socke. Er isch en Rauhoorelo. E stattlich Maa, oder?

Mis Mami

Da isch mis Mami Clea. E wunderschöni Elohündin.

Di grosse Lüt säge, ich wärdi ähnlich wie si. Da würd heisse, ich gib e ufgweckti, intelligänti und wiffi Hündin. Tönt nid schlächt, oder?

Akyra

Wer bin ich ächt wer? Ich bi ürsprünglich d'Alea gsi und jetzt dank de Fründin vo mim Fraueli em Anki heiss ich AKYRA. Ich ha da Wucheendi Bsuech gha vo minere zukünftige Familie.

Mir händ e tolle Tag zäme erläbt und am 13. Mai zieh ich definitiv in ihres Huus i.

Mini Familie freut sich riiiiiesig!

Eso cha me läbe...

Eusi zwoi Schlofchappe mache es Pfüsli.

Wer weiss, viellicht chunt gli no öper meh derzu??

Die erschte Spielsache

Me seit doch; d'Vorfreud isch die schönschti Freud, drum händ mir au grad es Kuschelchüssi und es paar Spielsache ikauft. Het eifach müesse si!!!

Super, eusi Hundebox isch hüt acho. Mir händ zwar de Hund noni, aber spielt da e Rolle ??

I probier da Johr e neui Sorte Geranium us. Es sind Halbhänger.

Denn chan i au alles useputze und muess nüm über's Balkongländer hange.

I lo mi mol überrasche.

So gseht de Brunne im April us.

und wie ächt Endi Summer?

Euses Chrüterbrünnele

De Früehlig het Izug ghalte.

Da isch euse chline Chrüterbrünneli.

Fc Zeinige

De Kevin isch bim Fc Zeinige neu als Goali.

Er het de Plausch, obwohl si bis jetzt kei guete Start gha händ.

Es cha nur besser wärde!!

Euse Kevin als Koch

Euse Kevin het i de Frühligsferie e Schnupperlehr als Koch im Rest. Poscht in Böze gmacht. Es het ihm sehr gut gfalle. Ich find es würd no zu ihm passe. Wer weis???

Luigi uf em Chatzebaum

Wo isch denn euse Luigi wo? Hüt nomitag het er 1.mol sis Mittagsschlöfli

uf em neue Chatzebaum gmacht. Es het em gfalle, denn er isch 4 Stund nüm abe cho!!

Super, de Chauf het sich glohnt!

Luigi's Chatzebaum

Da isch em Luigi si neue Chatzebaum.

Mir händ de i de Nöchi vo Luzern gholt und jetzt stoht er bi eus dehei.

De Luigi het ihn efang e bitzeli aglueget, meh aber au nid!

Jä, nu viellicht bruucht er ihn denn, wenn mer de Hund bechöme??

Mir gfallt er uf jede Fall!

Dörf ich vorstelle: Das sind Elo's. Das isch e Hundezucht, wo's sit em Johr 1987 git.

Scho sit langem, sind mir am überlege, öb mir nid e Hund wänd zue tue. Da heisst, eigentlich wünscht sich mi Maa scho sit er e chline Bueb isch e Hund.
Eso langsam cha au ich mi mit dem Gedanke afründe...
Doderbi bin ich uff die Hunderasse gschtosse, wo mir mitlerwile so sympatisch worde isch. De Elo isch e Züchtig zwüsche emene Eurasier, em Bobtail und emene Chow-chow. Me seit,es isch e ganze e tolle Familiehund, wo nid viel bällt, sehr guet uschunnt mit andere Mensche und Tier.
Und öppe eso, wie's uff em Bild isch, chönnt denn euse Hund emol usgseh. Luschtigerwies, gsend die ebe nid alli glich us. Es git Rauhhoorelo's und Glatthoorelo's.
Jetzt git's no einiges z'Erledige, bis mir denn, wenn alles klappt, Endi Juli euse Hund bechöme.
Jä, jä, das sind News. Ich dänk, ich wird in nöchschter Ziit immer wieder öppis z'brichte ha!

So, jetzt isch die Ziit vom Kranksii verbi!!! Es goht mir wieder guet und da blibt hoffentlich lang eso!